Gwamnan jihar Jigawa Malam Umar Namadi Ya Jagoranci Rabon Kayan Karatu 147,800 a Jahun
Gwamnan Jihar Jigawa, Malam Umar A. Namadi, ya jagoranci rabon kayan koyarwa da karatu guda 147,800 a Ƙaramar Hukumar Jahun, a wani mataki na ƙarfafa harkar ilimi da inganta yanayin karatu a makarantun jihar. Rahotanni sun nuna cewa shirin ya haɗa da rabon jakunkuna da sauran kayan makaranta ga ɗalibai domin tallafa musu wajen karatu.
Da yake jawabi yayin bikin, Gwamna Namadi ya ce gwamnatinsa za ta ci gaba da saka jari a fannin ilimi ta hanyar samar da kayan koyarwa, horas da malamai, da kuma inganta abubuwan more rayuwa a makarantu.
Ya bayyana cewa ilimi shi ne ginshiƙin ci gaban Jigawa, yana mai cewa zuba jari a wannan fanni zai taimaka wajen samar da ƙwararrun matasa masu amfani ga jihar da ƙasa baki ɗaya.
Shirin na gudana ne a ƙarƙashin jagorancin Kwamishinan Ma’aikatar Ilimi Mai Zurfi, Kimiyya da Fasaha ta Jihar Jigawa, Farfesa Isa Yusuf Chamo, wanda ke ci gaba da jagorantar aiwatar da manufofin gwamnatin jihar na inganta ilimi a matakai daban-daban.
Wannan na zuwa ne yayin da gwamnatin Jigawa ke ci gaba da faɗaɗa shirye-shiryen tallafa wa ɗalibai da samar da kayan karatu domin bunƙasa ilimi a faɗin jihar.
