Trump da Kim sun gana a Singapour

Shugaba Donald Trump na Amurka da takwaransa Kim Jong Un na Koriya ta Arewa sun yi musabaha da juna a cikin wani yanayi mai cike da tarihi da ke zama musabaha ta farko da aka yi tsakanin wani shugaban Amurka da ke kan mulki da kuma wani shugaban Koriya ta Arewa.

A lokacin wannan haduwa wacce ta gudana a wani kasaitaccen Hotel na tsibirin Senatoci a Singapour Shugabannin biyu sun yi doguwar musabiha cikin murmushi a gaban jerin tutocin kasashen nasu guda biyu.

Shugabannin biyu sun yi ganawar keke da keke ta kimanin mintoci 50. Kuma da yake jawabia gaban ‘yan jarida a karshen wanann ganawa Shugaba Trump ya ce ganawar ta yi armashi sosai fiye da duk yadda wani mutun zai iya tsammahani.

Shugaba Kim Jong Un ya bayyana farin cikinsa da saduwa da Shugaba Trump inda ya ce lalle sun sha daga kafin su kai ga cimma wannan nasara.

Shugabannin biyu dai sun saka hannu kan wasu takardu inda Shugaba Donald Trump ya sha alwashin tabbatar da tsaron lafiyar Koriya ta Arewa.

Kazalika Shugaba Trump ya bayyana cewa za su ci gaba da ganawa lokaci-zuwa lokaci da takwaran nasa Kim jong Un wanda ya ce zai gayyata a fadarsa ba da jimawa ba.

Leave a Reply

Your email address will not be published. Required fields are marked *